Оновчтой шийдэл?

...Японд CO2-ыг бууруулж, ирээдүйг аврахын төлөө жил бүр өдийд тог унтрааж лаа асаадаг хөдөлгөөн өрнөөд л. Энэ жил өмнөх жилүүдээс нэлээн өргөн хүрээтэй, хөл хөдөлгөөн ихтэй болж байх шиг байна. Аймаг дүүргүүд ч идэвхтэй оролцоод, өнгөрсөн амралтын өдрүүдээр энд тэндгүй лаа асааж романтик уур амьсгал үүсгэв. 7 сарын 7-нд сүртэй лаа асаах болов уу гэж. Компани, байгууллагууд ч энэ субботникт оролцож, байрныхаа тогийг тодорхой цагт унтрааж, нэг талаас өөрсдийгөө сурталчилж нөгөө талаас нийгмийн үүргээ биелүүлж буй аж.
Гэтэл нэг компани энэ кампаант ажилд оролцож байгууллагын тогоо унтраах уу яах уу гэж нэлээн бодож тунгааж сүйхээт арга олсон нь яг тэр цагт нь "хөшгөө буулгах" байв. Нүд хуурсан юм хийж байгаа ч юм шиг хачин. Нөгөө талаас яг л "Японы нийгмийн сэтгэлгээний нэг илэрхийлэл үү" гэлтэй. Нийтийн ажилд "огт оролцохгүй хойрго байгаа юм шиг харагдахгүй", тог унтраая гэсэн зорилго зүтгэлд нь "саад болохгүй", ямар нэг байдлаар бусадтай нэг адил байж харагдах гэсэн үзэл сэтгэлгээ???

Багшаа голов?

...Англи хэлний хичээл. Баахан япончууд...Ирланд багш нэг нөхрөөс ямар ажил хийдгийг асуув. Мань нөхөр компьютэрийн мэдээллийн хадгалалт (storage) хариуцдаг юм.
- Компьютаа дата стрээжи (storage гэдэг үгийг япончилж иймэрхүү дуудлагатай болчихсон).
Багш стрээжи гэдэг үгийг сонсоод огт ойлголгүй гайхаж дахиад лавлав. Шавь унаган англи хэлтэй хүн англи үгээ мэддэггүй юм уу гэсэн янзтай өөдөөс нь бүр ч их гайхав. Хэд хэд асууж хариулсны эцэст багш бичүүлж үзээд нэг юм ойлгов болтой Аан тийм үү, стөрэж юм байна шүү дээ гэлээ. Манай нөхөр толгой сэгсэрч "Ноү Ноү багш аа, стрээжи...стрээжи" гэж нерв хөдөлсөн болтой багшийн хэлснийг засаж, бусад нь ч багш аа стрээжи юм шүү гэж бухимдангуй байдалтай багшид заацгаав. Багш англи дуудлагаар стөрэж юм аа гэж тайлбарлах гэж оролдсон нь ч ойлголцолд хүрсэнгүй. Стрээжи стрээжигээр үлдэв.